4)الحب:-

الحب ممكن يكون أهم حاجة فى حياتنا أحنا كبنات، لأنه بالنسبة لنا زى الوقود اللى بيساعدنا على الاندفاع فى الحياة ودائما الست أو البنت الناجحة بيكون ورا نجاحها أما قصة حب عظيمة ناحجة أو قصة حب عظيمة فاشلة، الحب بيشغل حيز كبير من حياتنا وتفكيرنا وأحنا عاطفيين بالتكوين وده مش عيب دا أهم صفات الأنثى زى ما الرجولة كلمة بتحمل معانى شخصية الرجل، الأنوثة مرادفة للحب والحنان والرقة، لكن الزمن أتغير، والحب الحقيقى دلوقتى بقى نادر، ومشكلتنا أحنا كبنات أننا بنصدق أن اللى قدامنا بيحبنا لشخصنا زى ما أحنا بنحبه لشخصه ومستعد يتقبل عيوبنا زى ما أحنا بنعشق عيوبه، لكن الراجل أو الحبيب مواصفاته مختلفة والحب عنده مرحلى، وعنده استعداد يغير الحبيبة زى ما بيغير التعبان جلده، الست جزء صغير من حياة الراجل ما يقدرش يستغنى عنه بس يقدر يستبدله بسهولة، ولأن الرجالة أطفال فأحنا لعب وأى طفل بيزهق من لعبته ويمل منها، يمكن كلامى يبان معقد وجاى من واحدة معقدة، لكن والله هى ده الحقيقة ببساطة أنا فضلت أسأل نفسى سنين ليه بنعرف المتجوزين من المخطوبين من الحبيبة عارفين ليه مش عشان الست بتتغير بالعكس الست بعد الجواز بتكون أكثر تعلقاً بجوزها اللى بيكون كل دنيتها أما الراجل فبيكون خلاص لعب باللعبة وفتحها عشان يكتشف هى مكونة من ايه وزال غموضها وسحرها بالنسبة له وأصبح البحث عن لعبة جديد تحمل غموض ساحر هو ده الهدف، والراجل زى ما الحكمة الذكورية بتقول بيشوف كل ستات الدنيا إلا أمراته، وبالرغم أنى بأقولك ده لكن لا هنبطل نحب ولا نتجوز، بالعكس الوقت الجواز زى الصيد البنت المتجوزة صيادة ماهرة والتانية اللى من غير جواز صيادة خيبانة، المشكلة أن المعايير مختلفة فى كل حالة وماعدش مقياس أقدر أدلك بيه على أنك تكونى صيادة شاطرة بس اللى أعرفه عن الصيد طمعى السمكة بالطعم لكن أوعى تديه الفرصة يأكل الطعم ويجرى قبل ما تشبيكيه فى الصنارة وتطلعيه من المية عشان يفقد قدرته على الفلفصة منك (ههههههه)

3)العلاقات:-

أكتر حاجة بتسبب تعاسة للبنت أو الست أن تكون علاقتها بالأخرين سيئة وده مش بس بالنسبة لعلاقتها بالجنس الآخر لكن كمان علاقتها بالآخر أيا كان ست أو راجل حتى الأطفال، ماحدش ينكر أبدا انه بيحب لما يدخل مكان يحس بترحيب حقيقى ولهفة من الناس عليه وأنهم حابين وجوده ومستئنسين بيه، ودا بيفرق كتير معانا واللى تقول انها مش مهتمة بشعور الناس ناحيتها أما أنها مش قادرة تكسب الناس أو انها دايما محاوطة نفسها بناس مش مناسبين، والحقيقة أن موضوع العلاقات معقد وفيه عمق ، لآنه يبدأ من لحظة الميلاد حتى من قبل الميلاد علاقتك بمامتك هى صاحبتك بتفهمك بتحس بيك أنت حاسة أنها قريبة منك بتستوعب مشاعرك بتفهم مشاكلك وبتقدرها، علاقتها بيك علاقة قهر وإذعان، ولا مش مهتمة أصلا ولا بتدلعك لدرجة أن المسائل منفلتة على الآخر، ولا بتدخل فى كل كبيرة وصغيرة وخانقاك، ولا كل مشاكلك هايفة بالنسبة لها، ولا مكبرة دماغها على الأخر منك ومن مشاكلك،ولا بتستغلك لمصلحتها لانها هى نفسها محتاجة حد يشيل معاها مشاكلها، مامتك أى واحدة من دول، كم مرة قعدت معاك وسمعت مشكلتك بتركيز واتكلمت معاك وخففت عنك واديتك نصايح ونفعت وتابعت الموضوع من غير ما تعتبره ذله تضايقك بيها لما تختلفوا سوا وتفكرك بأنك مذنبة ومجرمة وتخليكى تندمى أنك حكيتى لها أصلا، طيب وبابا بقى اخباره ايه هو ده المشكلة الكبيرة عارفة ليه الأم ممكن يكون لها بديل بأخت كبيرة أو جدة أو عمة أو خالة أو صديقة حتى أما الأب فده أول راجل فى حياتك بجد بتتعلقى بيه وبتحبيه وبتنتظرى منه كل الحب والرعاية والاهتمام ويوم ما بيهملك أو بيقولك عنك كلام مش كويس بطريقة مش كويسة بيكسر فيك حاجات وحاجات وبتبتدى تدورى على حد يحبك بره البيت خصوصا لو الأخوات كل واحد فى العالم بتاعه وماحدش دريان بيكى وعلاقتهم بيكى اما استغلال او تدخل من باب حب السيطرة، لكن ما ننكرش ان فيه ناس سوية عندهم مشاكل اه بس مشاكلهم مش بينسوهم انهم عيلة لازم يحبوا بعض ويدعموا بعض ويفهموا بعض مش يتصيدوا الأخطاء لبعض ويجرحوا بعض، طيب لو واحدة فى الوضع الأول تعمل ايه معقولة تتجاهل علاقتها المضطربة بأقرب الناس ليها؟ طيب تستبدلهم بمين؟ ولا تنعزل بقى وتنطوى على نفسها؟ الحقيقة أن الوضع ده مش سهل أبدا دا وضع أنا بأشفق على اللى عايشين فيه منه، لكن الحل مش أنك ترمى نفسك فى وسط مجموعة مش مناسبة ليك وتعملى منهم أصدقاء يعنى أياك والهرب من المقلاة إلى النار، ولا أنك تكونى فى سن مش مناسب وتقعى فى تجارب حب مع ناس مش مناسبين ينصبوا على مشاعرك ويدمروكى أكتر وأكترلمجرد أن تشبعى حرمانك العاطفى من العلاقات الطبيعية عارفة مين يعوضك بجد ويحميكى من كل الهوسة الكدابة دى، ربنا استعينى بيه وده كلام والله ماهو نظرى ربنا هيحبك وبيحبك اكتر من كل اللى حواليكى،عمره ما يتخلى عنك ولا هيبخل عليكى برحمته وهيفتحلك أبواب رحمة كتيرة وهو أرحم بيك من أبوكى وأمك مش كده وبس ماهو كده كده شايفك وعارف انت بتعملى ايه هيقبل اعتذارك عن اى خطأ لا عمره هيذلك ولا هيفضحك ولا هيحرمك من شىء هتطلبيه منه يمكن يؤخره لسبب خليك موقنة أنه لمصلحلتك أكيد، الأهم أنه بأيده كل شىء ويقدر يحسن أوضاعك فى ثانية حتى لو قلتى لنفسك أن ده محتاج معجزة، هو الوحيد القادر على صنع أى معجزة، وهو أدانا الحل لما قال أننا ندفع بالتى هى أحسن وساعتها أعدائنا ينقلبوا لأحبائنا وده هتقولى انه صعب طيب نقول شوية وصفات:

1-عودى نفسك ما تتدخليش فى مشاكل مالكيش فيها.

2-ما تبديش رأيك فى حاجة لو ما حدش طلب ده منك.

3-أنصحى الناس بس خلى مقدار النصيحة وأسلوبها ونوعها على قد علاقتك باللى قدامك، بمعنى أن النصيحة اللى تديها لصاحبتك الانتيم مش زى اللى هتديها لزميلتك أو زى اللى هتديها لأختك.

4-عودى لسانك على المجاملات اللطيفة بدون مبالغة ولا نفاق الناس بيحبوا اللى يقولهم كلام حلو وبيكرهوا اللى يجرحهم او اللى بينتقدهم علطلول.

5-ابعدى عن بتوع الغيبة والنميمة أكتر حاجة تكره الناس فيك انك تقعدى فى وسط مجموعات اتعرف عنهم انهم بوشين أو نمامين أو بيحبوا يذكروا الناس بالشر فى غيابهم.

6-أسرارك وعيوبك ملكك طول ما هما جواكى وكلما احتفظتى بيهم لنفسك قلت نقط ضعفك فى عيون الآخرين.

7-لو قررتى تحكى لحد اختاريه بعناية وبعد ما التجارب تثبت لك أنه شخص أمين عمره ما هيستغل أسرارك ويستخدمها ضدك فى يوم من الأيام وده يكون لشخصين أو ثلاثة على الأكتر فى حياتك.

8-حاول تكونى هادية، اسمعى اكتر ما تتكلمى الناس بتحب اللى يسمعهم ويتفاعل مع مشاكلهم بدون مبالغة وحاولى تكونى على الحياد أو تتصرفى بدبلوماسية لو ما كانش عندك رد مقنع ومناسب للى بيتحكى لك بحيث ما تظهريش أقل اهتماما أو شخصية عبيطة يندم اللى بيحكى لك على أنه حكى لك.

9-قدمى خدمات للى حواليكى بدون مبالغات عشان ما حدش يحاول يستغلك لكن الناس تعرف انك خدومة ولما ترفضى تقدمى مساعدة أو خدمة لحد أرفضى بدبلوماسية بدون ما تجرحية ولا تدى عن نفسك انطباع انك انانية وكمان ما تحمليش نفسك فوق طاقتها فتظهرى بمظهر البنت سهلة الاستغلال وازنى بين الأمور.

10-الابتسامة الهادئة بتدى انطباع كويس عنك، ولما تقعدى مع ناس حاولى تكونى مرحة ابعدى عن الكآبة والحديث عن المشاكل والمصايب الناس بتتضايق من الشخص اللى مفيش وراه غير الشكوى، وبتحب الشخص اللى قعدته مرحة بس أوعى تزوديها فتتحولى لمهرجة أو فقرة كوميدية الناس بتحب تتفرج عليها.

11-اتحركى برشاقة وخلى مظهرك مقبول الناس بتحب المظهر المشرق الحيوى بيديهم احساس بالتفاؤل والأمل فيحبوا رؤيتك.

2)اللبس:-

ماحدش يقدر يقول أن اللبس حاجة هايفة، أحنا ساعات بنحاول نقلل من أهميته لما تقل فلوسنا جوه شنطنا، وتزيد أسعار اللبس فى المحلات، لكن اللبس مهم، وبيدى عننا انطباعات، وممكن يكون واحد من أسباب تعاستنا أننا مش قادرين نلبس كويس، يعنى مثلا لو انا مش بألبس كويس يبقى أما أنى مهملة أو أنى فقيرة، وللأسف كلمة كويس مطاطة، يعنى كل فئة من الناس بتشوف الكويس ده من وجهة نظر مختلفة، الملتزمين بيشوفوا اللبس المحتشم الطويل الفضفاض هو ده الكويس، والأغنياء بيبصوا لماركة اللبس والمحل اللى اتشرى منه وتمنه وده اللى بيخليه كويس، وفيه ناس بتشوف الكاجوال كويس، وناس بتشوف الفواتح، والتانيين بيشوفوا الغوامق، وكده يعنى عشان كده إرضاء كل الأذواق بيكون صعب، ولأننا كتير بنتعامل مع فئات مختلفة من البشر، فده بيشتتنا وبيخلينا مش عارفين نحدد الكويس، وكمان الميزانية والحالة النفسية، يعنى ساعات لما اكون حزينة بأبقى مش مهتمة بتناسق لبسى وتناسق ألوانه ولا هو مكوى ولا لأ، وأحياناً بأحاول أخبى اكتئابى ورا الاهتمام الشديد بلبسى ومكياجى، أحياناً بأكون شديدة الالتزام فى لبسى لما بأحس أنى قربت من ربنا،وأحياناً بأفضل الكاجوال عشان أحس بالحرية ، اللبس جزء مهم من شخصيتنا، دا اللى اتزرع فينا من الأفلام اللى دايما تظهر الشخص الضعيف فى مظهر مضطرب وملخبط،ولما يبدأ يفوق أول حاجة بيعملها يغير مظهره، كل الدنيا بتحكم عليكى من مظهرك.

 يعنى تخيلى نفسك لابسة لبس مقطع ومبهدل وشبشب وداخلة فندق خمس نجوم وفى جيبك دفتر شيكات بخمسة مليون بس ماحدش يعرف، عارفة إيه اللى هيحصل، أمن الفندق هيجرى وراكى وهيعتقلك ويبلغوا البوليس ويفتشوكى، وفين وفين لحد ما يكتشفوا أنك مليونيرة فيعتذروا لك بس كلهم هيحكموا عليكى انك مجنونة ومتخلفة لأن عندك 5 مليون ولابسة بالشكل ده،ولنفترض العكس انك لابسة كويس جدا جدا ومفيش معاكى فى جيبك غير 10 جنيه وداخلة نفس الفندق هتلاقى اللى يقولك يا هانم واللى يشيل عنك الشنطة وبسرعة هيحجزوا لك أجمل جناح فى الفندق، ولما نتكلم عن المظهر النسائى الأمر أبشع كتير لأنه مجال تنافسى، كل لحظة موضة وشكل والمقبول هنا مش مقبول هناك، والجميل دلوقتى وحش جدا بعد شهرين، والمناسب فى ظروف وأماكن معينة مش مناسب فى التانية، وقطع كتير كتير، ناس كتير استغلوا التغير الهرمونى عند حواء، واللى بيسبب لها تغيرات مزاجية بتأثر على نفسيتها ، وأن الست فى كل مكان وزمان بتحب تتعرف أنها حلوة وجزء كبير من حلاوتها بيتوقف على لبسها، وده كمان راجع للإعلام، وعشان كده محلات الملابس المتخصصة فى اللبس النسائى أكتر بكتير من محلات اللبس الرجالى، ومع الملابس الاكسسوارات والمكياج، اللى دايما بيضيف الحقيقة.

 والحقيقة أن مروجى الموضة عارفين أنهم أقوى تأثيراً على المرأة من الأطباء النفسيين ومن رجال الدين أحيانا، وده مش بس للستات الضعفاء فى إيمانهم أو شخصياتهم، بالعكس كل ما الست بتوصل لمكانة أكبر وبتتدين أكتر الصراعات بتزيد جواها والضغوط بتزيد عليها، وكل ما أتظاهرت بأنها قوية ومركزة فى عملها كل ده ما يكون معناه أنها من جوه شديدة الهشاشة بس هى بتحاول تخفى ده، وده مش وحش ولا يسىء لنا كبنات أو ستات، بالعكس؛ جميل أن الست ما يظهرش ضعفها فى صورة تصرفات هبلة وغير مسئوولة، وجميل أنها يكون عندها لحظات حزنها، وجميل كمان أنها حتى لو الكل أعتقد أنها نسيت أنوثتها لأنها بتشغل منصب لازم له قوة شخصية وقوة تركيز، ففى الحقيقة هى أنوثتها بتكون وحشتها، ومفيش ست فى أى حالة أو أى مكانة أو فى أى ثقافة أو أى سن ما بتحبش تلبس كويس، من أول البنت الصغيرة جداً لحد الست المسنة خالص مرورا بالمنقبات واللى لابسين كاجوال، الزينة اتخلقت للمرأة والمرأة اتخلقت للزينة، ومش هاضحك عليكى وأقولك مظهرك مش مهم ، بالعكس مظهرك جزء من شخصيتك بيعبر عنك أنتى مين؟ معتقداتك إيه وعاوزة تصنفى فى أى فئة، دا حتى طموحك أحياناً بيتحدد من شكل لبسك يعنى عمرنا ما هنشوف مديرة إدارة أو سيدة أعمال، أو أستاذة جامعية لابسة بادى وبنطلون جينز وكوتشى ، عشان كده عندى بعض النصايح المتجربة ليك وهى:-

1-اللبس أساسى مش فرعى لكن إياك والهوس بالموضة.

2-مش كل موضة تناسبك أنتى بقوة شخصيتك اللى بتفرضى الموضة.

3- جزء من تخفيف التعاسة أنك تشترى لنفسك لبس جديد كل فترة والتانية.

4-لو لقيتى الميزانية بتاعة الشرا أكتر من اللى فى شنطتك أعملى جمعية أو بيعى حاجة مش لازماكى، أو استلفى من ماما أو اختك وسددى على اقساط.

5-المحلات الكبيرة والمتوسطة بتعمل أوكازيونات فى أخر كل سيزون دا التوقيت المناسب للشرا.

6-أوعى تشترى لبس غالى لآنه من محل كذا أوماركة كذا لفى على المحلات الأول بكل مستوياتها ممكن تلاقى نفس الموديل ونفس الخامة فى محلات فى شوارع جانبية مش مشهورة وهتكون أزيائها حلوة أوى عليكى وبأسعار مناسبة خالص.

7-أفتكرى اللبس عمره ما هيعمل منك شخص كويس أنت بشخصيك الكويسة اللى هتعملى من اللبس إضافة لشخصيتك.

8- مش بس نوع اللبس وماركته هما اللى بيحددوا أعجاب الناس بيكى وأنتى لابساها لكن كمان طريقة لبسك وحركتك وابتسامتك والمكان اللى انت لابسه فيه لبس بيتلائم معاه وثقتك فى نفسك وتناسق ألوانه ونضافته وإتقانك وانت بتكويه.

9-ما تصدقيش الناس حتى لو متخصصين فى الموضة اللى يقولوا لك أن الوان معينة بتليق على البيض والتانية بتليق على السمر، البس وجربى وشوفى، ولو كنت مش بتثقى فى رأيك خدى 2 من صحباتك الناس بيقولوا عنهم أنهم بيلبسوا كويس وخليهم يشاركوكى الحكم على اللبس اللى هتشريه.

10-مش كل حاجة قديمة تترمى فى حاجات قديمة بإضافة صغيرة ترجع تانى تنور دولابك وتضيفله.

11-ما تكونيش ثابتة يعنى مش لازم نفس البلوزة على نفس الجيبة غيرى التجديد هيحسس الناس أن عندك كم وأنك شخصية متجددة.

1)الجمال:-

سؤال مهم فى حياة كل بنت أو ست طبيعية أنا جميلة ولا لأ؟ وصدقينى كل الرجالة اللى بيقولوالك أن أهم حاجة فى الست عقلها وشخصيتها، هم أول ناس بتلفت نظرهم الست الجميلة، بس صحيح أن الجمال نسبى ولولا أن حكمنا بيختلف من شخص للتانى فى الحكم على مسألة الجمال الشكلى دى كانت الدنيا خربت، يعنى لولا اختلاف الأذواق لبارت السلع، وتعالوا نسأل نفسنا، هو لو ماشية فى الشارع وحد قال عنى وحشة ست أو راجل شعورى هيكون إيه، بلاش لو فضلت أمشى فى الشارع طول عمرى وكانى طيف أو شبح ماحدش شايفة أو واخد باله منه، أو لو متجوزة راجل كل يوم بيقولى انى أوحش ست فى الدنيا، وأنه شرب أكبر مقلب لما اتجوزنى، أو أنى بنت وأتاخر جوازى وعدد المتقدمين لى قليل او نادر، أو لما أفتح التلفزيون وألاقى المذيعة حلوة والبنت بتاعة الاعلانات حلوة والممثلات حلوين، والستات الضيوف فى البرامج كمان حلوين، والبنات الحلوة فى عيلتى بيتجوزوا قبل منى مع أن شخصيتى ومؤهلاتى غير الشكلية أفضل منهم بكتير، أولو لقيت جوزى عينه هتطلع على البنات الحلوة اللى فى التلفزيون  ومش معبرنى خالص أو بيبص لى بصة اللى كان بيحلم بأكل الجاتوه وفجأة صحى قدامه طبق مش، أو لوأسمع تعليق زمايلى فى الشغل فلانة دى حتة موزة والتانية دى شربة، أو لو لقيت حد من أخواتى وهو بيدور على عروسة ورشحنا له واحدة كويسة بيقول عنها أنها زى الغفر هو أنا كمان هأتجوز واحدة شبهكم ، كل الحاجات دى بتسبب لنا تعاسة لأنها بتضعف ثقتنا فى نفسنا وبتضخم عيوبنا الشكلية فى عيونا لأننا للأسف بنشوف نفسنا بتركيز بس مش فى مراياتنا لكن فى عيون الناس، والناس حطت مواصفات شكلية وبدأوا يعذبوا نفسهم ويعذبوا الآخرين بيها، وبرضه ناس استغلوا هوس الناس بالشكل والجمال واخترعوا عمليات تجميل زرع وشد إضافة وحذف وكوافيرات تفتح ومحلات مكياج تبيع وبرامج تشتغلنى، وناس تطلع تدى محاضرات فى جمال الروح وجمال الأخلاق، الحقيقة أنو الصح أن أخلاقنا وقيمنا وآرائنا ومواقفنا وتوجهاتنا فى الحياة هى اللى بتحدد مين الأجمل فينا، لكن لأن العالم امتلىء بالأغبياء ربطوا المرأة وجمالها بالشكل دى حقيقة الأمر حتى لو طلع مليون واحد يقولوا غير كده ملايين غيرهم مؤمنين أن جمال الست فى شكلها وبينشروا فكرهم بكل طريقة وتأثيرهم كبير وبيوصل لنفوسنا، ولو راجل قال لست أنت وحشة خلاص بتصدق وثقتها فى نفسها بتتزعزع، بينما لو مائة ست قالوا لراجل أنت وحش ولا هيتهز فيه شعرة، عارفين ليه أحنا اللى سمحنا لفئة من الناس يحددوا لنا المواصفات الشكلية للبنت الجميلة وللأسف البنات والستات روجوا لده أكتر من الرجالة، أزاى لما تلبسى عدسات زرقا وخضرا يعنى بتقولى ان اصحاب العيون السود اللى انتى منهم انهم وحشين وانك مصدقة ان البنت اللى عيونها خضر أو زرق أجمل والسؤال هو الأجمل أمتلك عيون سود أقدر أشوف بيهم ولا المهم لونهم، وكمان لما أصبغ شعرى أصفر وأحمر وربنا خلقه أسود المهم أن عندى شعر والأجمل أنى أعرف أوظفه بشكل يضيف لوشى مش المهم لونه، ولو كنت سمرا أحط كميات من كريمات الأساس عشان أبان بيضا طيب ماهو مع مرور الوقت كتر الألوان هتبوظ كل شىء طبيعى جميل امتلكته وربنا وهبه لى وبعدين اللى تضحك على روحها وتقول أنها بتعمل كده عشان تعجب نفسها هى مش صادقة مع نفسها 100% وهى عارفة كويس أنها لو بقت حلوة زميلاتها وصاحباتها يمكن يغيروا منها وأن الرجالة هما بس اللى هيهتموا فعلا ويعجبوا بشكلها، بس أقولك حاجة أنا شخصيا شايفة أنه الصح أننا فى الأول ممكن نشمئز من الشخص اللى شكله وحش بس صدقينى تجارب كتير اثبتت انك لو قربتى من الشخص الوحش ده واتعاملتى معاه ولقيتيه طيب وشخصيته كويسة عيونك هتتعود على شكله وشوية شوية هتنسى مسألة الشكل دى خالص وده مش بس بالنسبة للناس اللى مش حلوين شكلا بالعكس البنات الجميلة أحيانا بتكون مشاكلهم أكبر لأن اللى قدامهم بيبص لهم على أنهم فاكهة عاوزة قضمة منها وبس يدوق الطعم ودا بيعرضهم لمشاكل فى حياتهم العاطفية لأن ماحدش بيحاول يكتشف جوهرهم والناس بتحكم عليهم من المظهر وأحياناً الأحكام دى ما بتكونش فى صالحهم وأحيانا بيكون عدد الخيانات الزوجية فى حالة الزوجات الجميلات أكبر، لأن الراجل بيكون خلاص داق الفاكهة واقتناها بس هو من التفاهة أن يتعمق فى معرفة الشخصية فيدور على فاكهة  تانية وهكذا،وأقول لك على نصيحة لو راجل أتقدم لك وحسيتى أنه متقدم لك عشان شكلك حلو أوعى تكملى معاه عشان ممكن بعد فترة يصاب بالملل ويتعود على شكلك ويدور على غيرك، أو أن شكلك يتغير بحادث أو بعامل السن أو غيره ، وبينى وبينك مفيش راجل يستاهل أنك تغيرى نفسك عشانه، بالعكس بقى هو اللى لو كان تفكيره سطحى كده لو ما كانش يتغير غيريه براجل بيفكر بشكل أحسن.

المراهقة هى بداية السباق

المراهقة فترة مهمة جداً دى التمهيد، بيبدأ كل شىء فى التغيير وتزيد القيود، وتتحط الحدود، وتبدأ أحلامك تتجاوز فك الشرايط وفرد الضفاير ، وتبدأ كلمات الأعجاب والمعاكسة تلفت انتباهك واهتمام ابن الجيران بيكى، وتبدأ الوقفة أدام المراية ومتابعة كل صغيرة وكبيرة فى وشك ويا خبر لو ظهرت حباية شباب فى وشك عشان كده هأديكى شوية ملاحظات لو أنتى فى فترة المراهقة أو دخلتى خلاص فترة الشباب وبقيتى فى الجامعة وتعالى نتكلم فى الحاجات اللى تهمك وبعدين أحكيلك أنا حصلى إيه يمكن تستفيدى من خبرتى وتجربتى

أبحثى فى طفولتك عن الجذور

 أيوة دورى على جذور مشكلتك فى طفولتك، طفولتنا أهم مرحلة فى حياتنا ودا مش كلام نظرى ، ولا كلام من الأبحاث والدراسات، دا كلام اكتشفت أنه حصلى أنا وصحباتى من اللى أتأخروا فى الجواز أزاى؟ أقولك

أنا عشت طفولة سعيدة جداً ، وكنت مدللة جداً كلت كمية شيكولاته ما كلهاش أى طفل ولبست فساتين واقتنيت لعب وتوك للشعر، وركبت مع بابا وماما مراكب وطيارات ولعبت فوق الجبال ومشيت فوق السحاب لما كنا ساكنين فوق جبل عالى جدا فى اليمن وشربت من عيون المية وجريت تحت المطر استخبى فى الوديان تحت الشجر، كان منغص طفولتى حاجتين أخويا اللى ماما حولتنى لمسئولة عنه طول الوقت، والحرية اللى كانت مسلوبة منى بس لأنى بنت دا غلط ودا ممنوع ودا عيب طبعا دى ماما أما بابا فراجل عسل كان شايف أن كلام ماما صح مادمنا مش هنوجع دماغه وأنها المسئولة الأولى عن تربيتنا.

طيب إيه علاقة التخريف ده بالعنوسة؟

هأقولكم 

1)شكل ماما وهى راجعة من الشغل بتجرى تعبانة عشان تطبخ وتغسل وتنضف البيت دا بعد ماتفوت على الحضانة أو المدرسة عشان تجيبنى أنا وأخويا وأد ايه دا كان بيخليها عصبية ومرهقة، وصورة بابا اللى قاعد مع اصحابه بيضحك وبيتكلم أو بيطلب من ماما طلبات أو نايم أو بيتفرج على التلفزيون أدانى انطباع عن الجواز مهبب لأن وعى الأطفال أكبر من تصوراتنا.

2)ماما أم ممتازة حبت تنمى جوانا عادة القراءة وما كانتش بتسمح لينا طول ما احنا فى مصر أننا ننزل نلعب فى الشارع مالقيتش أدامى غير القراءة وعلى حظى انى نقلت من فرفور الحيران لكتب بابا عن السياسة وكتب عن المستقبل والشخصيات العظيمة ودا خلا أحلامى تكبر بصورة مذهلة وعشان كده رسمت صورة لنفسى أنى شخص عظيم بدون زوج أو أولاد لأنهم هيخلونى بأزعق زى ماما وتعبانة ومشغولة بطلباتهم طول الوقت ، هتقولوا لى انى مبالغة ومفيش طفلة بتفكر كده طيب خدوا دى.

3)وأنا عندى 11 سنة وقعت فى أيدى قصة من عند بنت الجيران اسمها الأمضاء سلوى بطلتها باحثة اجتماعية كان جواها صراع عاوزة تكون باحثة عالمية وبتحب خطيبها ومش عاوزة تجوزه لأن جوازها معناه أنها هتوقف حلمها بالنجاح والوصول للعالمية فاتاكدت جواياى الحدوتة الجواز معناه أنى مش هاحقق حلمى وأقدر ابعتلكم شهاداتى من جامعة عين شمس فى الاجتماع عشان تعرفوا أد أيه انا حبيت سلوى ربنا يسامحها بقى.

4)عمرك وانتى صغيرة حضرتى عملية ولادة أو وقفتى بره الأوضة اللى فيها واحدة بتولد وسمعتى صرخاتها وألمها، أكيد وأنتى طفلة خفتى وقلتى فى نفسك لما تكبرى مش هتتجوزى.

5)أنا كنت بنت متفوقة وماما ما كانش بيعجبها إلا الدرجة النهائية، ولما كنت اجيبها تعتبر دا العادى، بابا دخلنى معامل الكيمياء والاحياء والفيزياء من سن 8 سنين عملت تجارب طلبة ثانوى يعجزوا عنها، وحفظت الجدول الدورى للعناصروغيرها، كل ده كان دايما مخلينى متحفزة للسباق مع حد عارفة بقى الواد الرخم اللى شايف نفسه والاساتذة دايما يشكروا فيه دا كان منافسى الوحيد اللى بيقضى على لحظات انتشائى باى كلمة يمدحوا فيها المدرسين ذكائى على فكرة اتقابلنا من فترة وهو بقى دكتور فى الهندسة ولسه برضه رخم هههههههه.

المهم أن كل ده رسم عندى صورة أنى لو عاوزة أنجح أسيبنى من الجواز خالص.

واكتشفت أن معظم صحباتى اللى عنسوا امهاتهم اتطلقوا أو كان الأب والأم محولين البيت لحلبة مصارعة، أو الأب مات فزوج الأم حول حياة البنت لجحيم، أو أو.........

بس سيبك من الطفولة والمرحلة الابتدائى كل ده بيتغير فى المراهقة مع أول واد يشبه رشدى أباظة. آه أعذرونى أصلى قديمة حبتين.

بداية المشوار

أيوة أنا اللى أطلقوا عليها عانس لأنها ما دخلتش قفص الزوجية وخدت لقب مدام لحد ما عتبت ال35 سنة وحط المجتمع الكريم نجاحاتى ومميزاتى فى كفة وحط العنوسة فى الكفة التانية، ولأن الجواز مش بس  علامة مهمة فى مجتمعنا دا كمان اكتشفت من قراءتى لأبحاث كتير أنه علامة فارقة فى حياة البنت حتى فى الدول الغربية رغم الحرية اللى أحنا بنعتقد أنها اتمنحت للستات هناك والعلاقات المفتوحة على البحرى والمساواة والحوارات دى كلها ، لكن الحقيقة أن كل الستات بتنشد الخلاص من كابوس العنوسة، وطبعا عارفة أن فيه غيرى كتير كتبوا عن القصة لدرجة أن كلامى هيبقى عند البعض زى المسلسلات التركى موجود عشان يملى فراغ وقت القنوات الفضائية ، بس يمكن لما حد يقرا كلامى ينفعه أو يدعمه وخاصة أن درجة الدكتوراه فى الاجتماع وسنين العنوسة وصحباتى الكتار أوى العوانس كل ده أتاح لى خبرات كتير ومش بس كلامى هيكون حوالين العنوسة لا، أنا هاتكلم عن تجربتى بكل مصداقية فى كل نواحى الحياة شغل ودراسة وأسرة، وتجارب غيرى بدون ذكر اسمائهم وقراءاتى ونصايح جربتها ونصايح قلتها لغيرى ونفعتهم ، ويمكن الكلام ده لو قريته واحدة بتعانى دلوقتى من اللى عانيت منه أنا وبنات كتير تعرف أنها مش لوحدها وأن فيه بنات كتير غيرها فى نفس الجروب وما تترعبش من عداد العمر اللى بيجرى، ويمكن كلامى لو ما دعمهاش بشكل كفاية فى قصة الجواز يخليها تعمل زيى وتشغل نفسها بتحقيق ذاتها المهم فى النهاية أنى بأحاول أساعدكم وأساعد نفسى على تحقيق المبادىء اللى جت فى كتاب ديل كارينجى بعنوان (دع القلق وإبدأ الحياة)، وتابعونى إذا لقيتونى مش عجباكم اكتبوا لى وأوعدكم أنى أوقف بس المهم اقروا تجربتى  للأخر قبل ما تحكموا